Nursultan Nazarbaev elimizdiń áleýmettik-ekonomıkalyq damý kórsetkishteri artyp kele jatqanyna qaramastan, memleket tarapynan qabyldanǵan baǵdarlamalar turǵyndardy tolyq qamtymaı otyrǵanyn aıtty.
– Birinshi jartyjyldyq aıaqtaldy. Kórsetkishter ósip keledi. Jalpy, halyqtyń ál-aýqaty jaqsy. Biz ındýstrııalyq, ınfraqurylymdyq jáne áleýmettik baǵdarlamalar qabyldadyq. Alaıda, jergilikti atqarýshy organdar men mınıstrlikter olardy tolyq oryndamaı otyr, bekitilgen baǵdarlamalar óńirlerge jetpeı jatyr, – dedi Memleket basshysy.
Elbasy kommýnaldyq qyzmet kórsetý tarıfteriniń óskenine jáne elimizdegi joǵary oqý oryndaryndaǵy oqý aqysynyń qymbattaǵanyna toqtalyp, medısınalyq qyzmet pen bilim sapasynyń tómendep bara jatqanyn atap ótti.
– Kommýnaldyq qyzmetterdiń baǵasy ósti. Medısınalyq qyzmet kórsetý nasharlady. Bilim alý qymbattap barady. Jastar bizdiń ýnıversıtetterdegi bilim sapasynyń tómendigine baılanysty Reseıdiń joǵary oqý oryndaryn tańdaıtyn boldy. Bizdiń qoǵamda osyndaı problemalar jıi kóterilýde, – dedi Memleket basshysy.
Qazaqstan Prezıdenti el ekonomıkasyndaǵy shaǵyn jáne orta bıznestiń rólin arttyrý, sondaı-aq kásibı memlekettik apparat qalyptastyrý máselelerine toqtaldy.
Nursultan Nazarbaev «Bes áleýmettik bastamany» jáne ınfraqurylymdyq damý baǵdarlamasyn sapaly júzege asyrýdyń mańyzdylyǵyn atap ótti. Sonymen qatar, Memleket basshysy óńirlerde jol salý máselesine de nazar aýdardy.
Sońynda Qazaqstan Prezıdenti Úkimet pen jergilikti atqarýshy organdar tarapynan qabyldanǵan memlekettik jáne salalyq baǵdarlamalardyń sapaly oryndalýyn qamtamasyz etýdi jáne olardyń júzege asyrylýyna muqııat baqylaý jasaýdy tapsyrdy.
